بعتني بالرخص وانته كنت غالي
والزمن يا صاحبي هذي ظروفه
بس أنا اتفاجأت في بعض الرجالي
شفت شي ما كان ودي إني أشوفه
رحت في ستين ما تطري فبالي
والله اعلم ما على مثلك حسوفه
الصداقه والوفا هي راس مالي
وانت مثلك تقتله طعنة سيوفه
الصداقه بالمقال وبالفعالي
طبع ثابت وانت فاكرها بروفه
غلطتك يا صاحبي فوق الخيالي
غلطة الجاني على نفسه بخوفه
يتبع الريح الجنوبي والشمالي
وين ما هبت تشله من كتوفه
ما يحسب العشره وحلو الليالي
والصنيع الزين في دربه يطوفه
ما يفكر بالحرام وبالحلالي
وان عرف باخطاه ما رده كسوفه
مثلك يموت بخزاه ولا يبالي
ما يهمه كيف ما كانت حتوفه
يصعب إنه يرتقي درب المعالي
للورى يصفق على حظه كفوفه
روح يا الغدار واتركني بحالي
يشهد الله ما على مثلك حسوفه....
